حلول لل BRT

عشان أكون مواطن إيجابي وبكفي أظلني أنتقد واطخ ومش عاجبني العجب، بدي أقدم مجموعة حلول لاستثمار بقايا مسارب المرحلة الأولى من الباص السريع، بدل ما يظل بوجوهنا ليل نهار وإحنا بنمر من الدوريات لحتى نفق الصحافة، وأتمنى من أمانة عمان أخذ اقتراحاتي بجدية وبعين الاعتبار، لأني بشوف إنه المسربين طالعات مرتبات وحرام يصيروا أطلال لمشروع نظل نتحسر ونبكي عليه فقد حان موعد العمل إلى الاقتراح.

أولا اقتراح إنه تعالوا يا جماعة الحراك بدل ما بتطلعوا كل يوم جمعة من الحسيني والناس بتتغلب لتصل البلد والأزمة بالطريق والمواصلات، خلص يصيروا يصلو الجمعة في مسجد الجامعة “ويا الأوقاف جيبيلهم خطيب يحمسهم ويحكي شوية عن أوضاع البلد عشان يصير بي إجر للمسجد” وبعدها بنطلقوا من المسجد بتجاه المسربين وبكون البك أب بستناهم هناك وبظلو يمشو لحتى الدوريات وبتطلع من الآخر المسيرة، خفيفة لطيفة وما بتسكر ولا شارع وبقدرو كمان ينوعوا إنهم يروحوا يصلوا يوم في مسجد أبو قورة ويمشوا باتجاه جسر الجامعة يعني إنت بس نقي، وأنا حتى شايف إنه بيش داعي لأمن يحاوط المسيرة وبمشوا بهدوء وسلاسة وبنصرفوا بهدوء في الختام، وهيك بنصير نسميه بدل خط الباص السريع خط الاعتصام السريع.

ثانيا  بي كثير محلات أثاث قبال المسربين فبقترح نبني كم من مظلة أو هنجر وينحط بيهن الأثاث والأدوات، وإذا بكلف خلص بنجيب الأثاث وبنلفه بشوادر يعني مش بينا السولافة بسيطة وبنأجر المسرب كمستودع ورح توفي.

ثالثا اقتراح يصير معرض سيارات، نجيب الوكالات مرسيدس، اوبل، هوندا وتويوتا نقلهم جيبو سياراتكم وصفوها هون والماشي بسيارته كل ما بمر عينه بتلمح هالسيارات الصافة عيساره وبطلع بعينه وإلا ينقي سيارة وأتوقع هاي تطلع صرعة تظرب كل معارض السيارات.

رابعا أقترح يتحول لملعب بل ملاعب، يعني جيبولكم واحد من جماعة “لتشييك مزارعكم” ويسوي شيك حول المسربين عالي، وهيك الشباب بتصير بدل ما تلعب بشوارع الحارات، وبتهرب من السيارات، بتروح بقلب قوي إلى قلب الشوارع وبتلعب بين السيارات والطابة ما بتروح عشارع وبتنفزر، وبالعكس هيك بنعزز الثقة بالنفس وبنعمل مكان آمن تترعرع به أجيال كروية تخرج من الحارات إلى البطولات.

خامسا يصير ميدان للمشي، وحتى بالعكس بنفع كمان لسباق الحواجز والتتابع وكل ألعاب القوى من الرمي بالقلة والرمح والصحن الطائر والوثب العالي والثلاثي والقفز بالزامة ونجيب بوبكا يفتتحه.

سادسا يصير للمناسبات، يعني بي إله ميزات كثيرة أهمها إنه بنقدر نسوي مسرب للصيوان ومسرب ثاني لصف السيارات والموقع مناسب وبندل بسهولة، حتى أنا بأيد يصير للعطوات والجاهات من منطلق إنه هيك هاي العادات الحميدة اللي عنّا ومش قادر تشرحها لعيالك بتصير وإنت مارق بالسيارة تقول للعيال، اطلعوا يا بابا/يا ماما على يساركم هاظا اللي قاعد بصير اسمه جاهة /عطوة، حتى إنه أبعاد المسرب مناسبة كمان للزفة والدبكة والهجيني وعزايم النسب وغدا العرس ولو يخططو أكثر للفكرة ممكن يصير لحمام العريس.

سابعا يصير كوفي شوب، تنحط هالطاولات على مسرب وصف السيارة على مسرب ثاني ولا أسهل منها، وبالعكس إطلالة ولا أروع يعني بتصير تشوف العالم الطالعة والسيارات، وبقترح الأمانة تشرف عليه من ناحية صحية بلكي يكون أول مقهى من ضمن المقاهي الخضراء على قاعدة المباني الخضراء صديقة البيئة.

ثامنا كل جمعة الناس بتحب تطلع تتبظع، والأسعار صايرة هالأيام نار فبدل ما تطيح على سوق العبدلي في الكراج القديم، يصير بي سوق جمعة على هالمسربين، وهذا رح يخدم سكان الجبيهة وصويلح وتلاع العلي وضاحية الرشيد والمدينة الرياضية، يعني رح يقدم خدمة مهمة ومفيدة للمواطن.

أنا يا جماعة قدمت مجموعة اقتراحات وبتمنى توخذها الأمانة بعين الاهتمام وأنا شايف إنه أغلبها ممكن تطبيقه وعملي ومش صعب، وهيك بتصير بي عوائد من هالمسربين اللي واقفات عبين ما ييجي حدا ويلغي تعليق المشروع.

ودمتم بود

Post a comment or leave a trackback: Trackback URL.

تعليقات

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: